काठमाडौं, २९ चैत । भारतमा जारी १२ औं सिजनको इण्डियन प्रिमियर लीगले यस वर्ष पनि टेलिभिजन टीआरपीमा उत्साहनक प्रगति गरेको छ । स्टार इण्डियाले आइपीएलको प्रसारण अधिकार लिएको छ ।
यस वर्ष दुई सातामै अघिल्लो वर्षको तुलनामा टेलिभिजनमार्फत आइपीएल हेर्ने दर्शक बढेको स्टार इण्डियालाई उदृत गर्दै भारतीय संचारमाध्यमहरुले उल्लेख गरेका छन् ।
स्टार इण्डियाका अनुसार यस वर्ष पहिलो दुई सातामा ३४ करोड ५० लाख दर्शकले आइपीएलका दौरान टेलिभिजन हेरेका छन् । अघिल्लो वर्ष भारतमा १० वटा च्यानलबाट आइपीएलका खेल प्रत्यक्ष प्रशारण गरिएको थियो ।
यस वर्ष च्यानल संख्या पनि २४ पुगेको स्टार इण्डियाले उल्लेख गरेको छ । यस वर्ष मूभि च्यानल र बच्चाका लागि प्रसारण हुने च्यानलबाट पनि आइपीएलका खेल प्रत्यक्ष प्रसारण थालिएको छ । यो टीआरपी भारतीय बजारको मात्र हो ।
अघिल्लो साल आइपीएल दर्शकमा केही गिरावट आएपनि यस वर्ष भने उत्साहजनक वृद्धि देखिएको बताइएको छ । यस वर्ष हिन्दी भाषी क्षेत्रमा २४ प्रतिशत दर्शक बढेको टीआरपी रिपोर्ट छ । दक्षिण भारतमा १५ प्रतिशतले बढेको तथ्यांक छ ।
