काठमाडौं, २८ जेठ । केहि महिनाअगाडि मात्र संचालनमा आएको राइड सेयरिङ्ग एप साथीमार्फत लकडाउनको समयमा मोबाइल फोन बिग्रिएर समस्यामा रहेका व्यक्तिहरुका लागि नयाँ सेवा संचालनमा आएको छ ।
साथी एपमार्फत अब ग्राहकहरुको घरदैलोमा नै मोबाइल फोनको पिकअप र ड्रप सर्भिस सेवा शुरु गरिएको हो ।
कोभिड १९ महामारीले गर्दा देशभर लकडाउनको अवस्था रहेको र संक्रमणबाट बच्नुपर्ने साथै सुरक्षित हुनुपर्ने अवस्थालाई मध्यनजर गरेर भर्खरै संचालनमा आएको राइड सेयरिङ्ग एप साथीले मोबाइल फोन पिकअप र ड्रप गर्ने नयाँ सेवा शुरु गरेको कम्पनीले बताएको छ ।
विभिन्न मोबाइल कम्पनीहरुका सर्भिस सेन्टरहरुसँगको सहकार्यमा वारेन्टी भएका तथा नभएका मोबाइल फोनहरु घर तथा कार्यालयबाट लिएर मर्मत पश्चात फेरी सोही स्थानमा पुर्याउने सेवा थप गरेको उसको भनाइ छ ।
यस एपलाई डाउनलोड गरी मोबाइल पिक एण्ड डेलिभरी सर्भिसमा क्लिक गरि बिस्तृत जानकारीहरु राखेर पिकअप सर्भिसको लागि अर्डर गर्न सकिनेछ ।
हालका लागि यो सेवा काठमाडौं उपत्यकाको रिङ्गरोड भित्र मात्र उपलब्ध रहेको छ भने केहि सयमपछि रिङ्गरोड बाहिरका स्थानहरुका साथसाथै देशभर क्रमश सेवा बिस्तार गरिनेछ ।
मोबाइल फोनको मर्मतको शुल्क लाग्ने भएमा ग्राहकहरुबाट लिएर सम्बन्धित मर्मत तथा सर्भिस सेन्टरहरुमा भुक्तानी गर्ने व्यवस्था राखिएको छ भने त्यसबाहेक पिकअप तथा ड्रपको लागि न्यूनतम ३५ रुपैयाँबाट यो सेवा लिन सकिने कम्पनीले उल्लेख गरेको छ ।
कम्पनीका कार्यकारी अधिकृत विक्रान्त रेग्मीले कोभिड–१९ को महामारीले लकडाउनको अवस्था रहेको र मानिसहरुबिच संक्रमण फैलन सक्ने हुँदा मोबाइल प्रयोगकर्तालाई सुरक्षित बनाउन यो सेवा शुरु गरेको जानकारी दिए ।
‘हामीले सबैलाई घर वा कार्यालयबाटै मर्मत तथा सर्भिस सेन्टरको सुबिधा लिन सकिने गरि सुरक्षित साथ सेवा दिनेछौं । यसले गर्दा सबैजना भिडभाडमा जानु नपर्ने तथा मर्मतपछि मोबाइल समेत समयमा नै उपलब्ध हुनेछ,’ कार्यकारी अधिकृत रेग्मीले भने ।
यस एपको अन्य मुख्य फीचर भनेको राईड सेयरिङ्गका लागि बाईक, स्कूटर र ट्याक्सी बोलाउन सकिनको साथै विभिन्न यात्राको लागि रिजर्भेशन गर्न सकिने छ ।
यसका साथै निकट भविश्यमा अफिसका कर्मचारीहरुलाई कार्यालयबाट घरसम्म ल्याउने र पुर्याउने सेवा समेत आउँदैछ । जसमा बस, माइक्रोबस, कार, जिपद्धारा घरबाट कार्यालय पुर्याउने र पुन घरमा नै ल्याउने सेवा हुनेछ ।
हाल यो साथी एप गूगलको प्लेस्टोरमा उपलब्ध रहेको छ भने केहि समयपछि एप्पलको एप स्टोरमा समेत उपलब्ध हुने कम्पनीको भनाइ छ ।
