काठमाडौं, ७ साउन । नेपाल राष्ट्र बैंकले नेपालका सबै बैंक तथा वित्तीय संस्थाका प्रणालीहरू सुरक्षित रहेको जनाएको छ ।
ह्याकरहरुले बैंकको सिस्टम ह्याक गरेर पैसा चोर्न धम्की दिएपछि राष्ट्र बैंकले बैंकिङ प्रणाली सुरक्षित रहेकाले आतंकित र त्रसित नहुन सबैलाई आग्रह गरेको हो ।
ह्याकरहरुले आतंक फैलाउन यस्तो फण्डा मच्चाएको भन्दै राष्ट्र बैंकले सबैलाई ढुक्क हुन आग्रह गर्दै यसबार थप अनुसन्धान अघि बढाइए जनाएको छ ।
ह्याकरहरुले बैंकहरुलाई बुधबार दिउँसो ३ः२८ बजे इमेलमार्फत अफलाइन र अनलाइन दुवै तरिकाबाट पैसा चोरी गर्ने भन्दै सन्देश पठाएपछि बैंकिङ क्षेत्र तरंगित बनेको थियो ।
बैंकले आफ्नो र ह्याक गर्ने भनेर किटान गरिएका बैंकहरुकोसमेत सबै प्रणाली परीक्षण गरिसकेको छ।
अहिलेसम्म राष्ट्र बैंकको आन्तरिक सिस्टम, आरटीजीएस, बैंक तथा वित्तीय संस्थाको कोर बैंकिङ सिस्टम, नेपाल क्लियरिङ हाउसलगायत सबै सिस्टम सुरक्षित रहेको बताएको छ । बैंक तथा वित्तीय संस्थाको व्यावसायिक कारोबारमा कुनै समस्या देखिएको छैन ।
ह्याकरले नेपाल राष्ट्र बैंक, कुमारी बैंक, नेपाल बैंक, नबिल, राष्ट्रिय वाणिज्य, माछापुच्छ्रे, एनएमबी, एनआइसी एशिया, बैंक अफ काठमाण्डू, सिटिजन्स इन्टरनेशनल, सानिमा, नेपाल एसबीआइ, एभरेष्ट, नेपाल इन्भेष्टमेन्ट र हिमालय बैंकलाई इमेल गर्दै पौसा चोर्न धम्की दिएका थिए ।
