काठमाडौं । अमेरिकी कम्पनी एप्पलले मंगलबार आइफोनको पछिल्लो संस्करण आइफोन १३ सिरिजका फोनहरू सार्वजनिक गरेको छ ।
एप्पलले मंगलबार क्यालिफोर्नियामा आयोजित कार्यक्रमकाबीच आइफोन-१३ का विभिन्न सिरिजका फोनहरु सार्वजनिक गरेको हो ।
आईफोनका यी मोडलमा क्यामेरालाई अझ परिस्कृत बनाइएको कम्पनीको दाबी छ । यसमा ए १५ बायोनिक चिपको प्रयोग गरिएको छ ।
यस्ता छन् विशेषता
आईफोन-१३ को ब्याट्री अन्य मोडलहरुभन्दा धेरै समय टिक्ने कम्पनीले दाबी गरेको छ । आईफोन १३ मिनीको ब्याट्री लाइफ १७ घन्टा, १३ को १९ घन्टा, १३ प्रोको २२ घन्टा र १३ प्रो म्याक्सको २८ घन्टासम्म रहेको कम्पनीले जनाएको छ ।
यो मोडलमा १२० हर्ज प्रमोसन डिस्प्लेका साथै क्यामेरा सिस्टम सबै नयाँ राखिएको छ । यी मोडलमा अल्ट्रा वाइड लेन्स र ३ एक्स अप्टिकल जुम छ । यस्तै, म्याक्रो फोटोग्राफीमा पनि यसमा राखिएको छ । यो फोन विभिन्न ५ वटा रंगमा उपलब्ध छ ।
आईफोन १३ मा अन्य मोडलहरूको तुलनामा केही ठूलो ब्याट्री राखिएको छ । यो मोडलमा सुपर रेटिना एक्सडीआर डिस्पले छ । यसले १ हजार निट्स सम्मको आउटडोर ब्राइटनेस दिन्छ ।
यी मोडलका आईफोन १२८,२५६ र ५१२ जीबीमा उपलब्ध छन् । आईफोन १३ मिनी र १३मा २ एक्स अप्टिकल जुम र १३ प्रो र १३ प्रो म्याक्समा ३एक्स अप्टिकल जुम छ । यो मोडलका आईफोनको अगाडिको क्यारमा १२ एमपी क्यामेरा छन ।
यो फोनहरु सेप्टेम्बर २४ देखि रिलिज हुने छन् । अमेरिका र यूकेमा भने १७ सेप्टेम्बरदेखि प्रि-अर्डर गर्न सकिने कम्पनीले जनाएको छ ।
मूल्य कति ?
आईफोन १३ मिनीको मूल्य ६९९ डलर (अर्थात ८३ हजार ८८० नेपाली), १३ को ७९९ डलरअर्थात ९५ हजार ८८० नेपाली), १३ प्रोको ९९९ डलर (अर्थात १ लाख १९ हजार ८८० नेपाली) र १३ प्रो म्याक्सको १०९९ डलर (अर्थात १ लाख ३१ हजार ८८०रुपैयाँ) बाट सुरु गरिएको छ ।
