काठमाडौं । मंसिर ४ को निर्वाचनमा चासोको क्षेत्र बनेको सुनसरी क्षेत्र नम्बर ३ का कांग्रेस नेता विजयकुमार गच्छदार र एमाले नेतृ भगवती चौधरी पनि अन्य उम्मेदवारहरू जस्तै यतिबेला आफ्ना क्षेत्रका मतदाताहरू माझ पुगेर भोट माग्न व्यस्त छन्।
तेस्रो पटक गच्छदार र चौधरी चुनावी प्रतिस्पर्धामा उत्रिएका हुन्। २०७४ को निर्वाचनमा झिनो मतले जितेका गच्छदार यो निर्वाचनमा पनि जित हासिल गर्ने दाउमा छन्। भने, अघिल्लो निर्वाचनको हार जितमा बदल्ने कसरतमा चौधरी लागि परेकी छिन्।
सुनसरीको दुहबीमा नेकपा एमालेले बुधबार चुनावी सभा गरेको छ । सभामा नेकपा एमालेका अध्यक्ष केपी शर्मा ओलीले नेपाली कांग्रेसका नेता विजयकुमार गच्छदारमाथि व्यंग्य कसेका छन्।
सम्बोधन गर्दै ओलीले जनताले जिताएर पठाएको मान्छे लुक्दै हिँड्नु विडम्बना भएको बताए।
‘सुनसरी ३ मा एउटा कर्मठ महिलालाई जिताउने कि लुकेर हिँड्नेलाई?’, उनले भने मतदातालाई सोधे, ‘यस जिल्लामा दुई कुराको फैसला गर्नुपर्छ। यस क्षेत्रले कस्तो मान्छे जिताउने?’
उनले गच्छदारलाई व्यंग्य कस्ने क्रममा जनताले जिताएर माथि पठाएको नेता हवल्दारसँग लुकेर हिँडेको बताए।
‘जितेर माथि पठायो मुद्दा लाग्छ। लुकेर हिँड्छ, भागेर हिँड्छ। जनताको प्रतिनिधि जनतामाझ हुनुपर्नेमा लुकेर हिँड्छ, कोसँग लुक्छभन्दा हवल्दारसँग। लोभिने कुरा देखेपछि मन थामिँदैन, बदमासी गर्छ र मुद्दा लाग्छ भागेर हिँड्छ।’
उनले देशभरी हेर्दा थारु जातिका छोरीले केही गरौँ भन्न खोजे बताउँदै भगवती चौधरीलाई जिताउन आग्रह गरेका छन्।
