काठमाडौं । सिभिल बैंक लिमिटेड र नेपाल टेलिकम बीच सम्झौता भएको छ । सम्झौतापत्रमा सिभिल बैकका तर्फबाट चिफ बिजनेस भोलाबहादुर बिष्ट र नेपाल टेलिकमको तर्फबाट प्रमुख व्यवसायिक अधिकृत संगिता अर्यालले हस्ताक्षर गरेका थिए ।
सो सम्झौतापत्र अनुसार पुस १ गते देखि नेपाल टेलिकमको मोबाइल सेवा प्रयोगकर्ताहरुले डाटा अन गरी सिभिल बैंकको मोबाइल बैंकिङ एप मार्फत फन्ड ट्रान्सफर, क्यूआर पेमेन्ट लगायत अन्य फिचरहरुको उपयोग गर्दा कुनै पनि शुल्क लाग्ने छैन ।
नेपाल राष्ट्र बैंकको विद्युतीय माध्यम मार्फत कारोबार गर्न प्रोत्साहन गर्ने नीति बमोजिम सिभिल बैंकले आफ्नो ग्राहकहरुको सुविधालाई मध्येनजर गर्दै यो सम्झौता गरेको हो ।
सिभिल बैंकको साढे चार लाख भन्दा बढी मोबाइल बैंकिङ एपका प्रयोगकर्ताहरु यस सम्झौतापत्रबाट प्रत्यक्ष लाभान्वित हुने कुरा सिभिल बैकका चिफ बिजनेस बिष्टले बताए ।
बैंकले हालसम्म रु. ९५.२४ अर्ब निक्षेप संकलन गरी करिब रु. ८७.०८ अर्ब ऋण लगानी गरेको छ । बैंकले हाल ११५ शाखा, १३ वटा एक्सटेन्सन काउण्टर तथा १०२ एटीएम मार्फत सेवा प्रदान गर्दै आएको छ ।
