काठमाडौं । नेपाल टेलिकमले देशका विभिन्न स्थानमा आफ्नो सेवा अवरोध हुनेगरी अवाञ्छित क्रियाकलापहरु बढेको बताएको छ । कम्पनीले मंगलबार एक विज्ञप्ति जारी गर्दै टेलिकमको उपकरणहरुमा क्षति पुग्नेगरी अवाञ्छित गतिविधि गरिदा सेवामा समस्या आएको बताएको हो ।
‘कम्पनीका सेवा अविच्छिन्न रुपमा उपलब्ध हुनका लागि उपकरण र संरचनाहरु चुस्तदुरुस्त अवस्थामा रहनु आवश्यक हुन्छ,’ विज्ञप्तिमा भनिएको छ । तर पछिल्लो समयमा देशका विभिन्न स्थानमा रहेका विभिन्न उपकरण र संरचनामा क्षति पुर्याउने र कम्पनीको सेवा प्रवाहमा अवरोध ल्याउने क्रम बढेको आरोप टेलिकमको छ ।
जसले गर्दा निरन्तर सेवा प्रवाहमा समस्या आउने गरेको दावी छ । ‘यस्ता अवाञ्छित गतिविधिका कारण अत्यावश्यक सेवाको रुपमा रहेको दूरसञ्चार सेवा प्रयोग गर्न पाउने सर्वसाधारणको नैसर्गिक अधिकारमा बाधा पुगिरहेको छ’, विज्ञप्तिमा उल्लेख छ ।
साथै कुनै स्थानमा यसरी सेवा अवरुद्ध हुनेगरी अवाञ्छित कार्य गरिरहेको पाइएमा वा कम्पनीका संरचनाहरुमा क्षति पुर्याईएको भेटिएमा नजिकको कम्पनीको कार्यालय तथा नजिकको सुरक्षा निकायमा खबर गरेर सहयोग गरिदिन आग्रह गरेको छ ।
