काठमाडौं । लौटारो मार्टिनेजको दुई गोलमा फियोरेन्टिनालाई हराउँदै इन्टर मिलानले कोपा इटालियाको उपाधि रक्षा गरेको छ ।
रोममा बुधबार राति भएको फाइनल खेलमा भएका सबै तीनवटा गोल पहिलो हाफमा नै भएको थियो । इन्टरको जितमा दुई गोल गरेका मार्टिनेजले सबैखाले प्रतियोगितामा गरी यो सिजन २७ गोल पुर्याएका छन् ।
इन्टरमा उनको यो अहिलेसम्मकै उत्कृष्ट प्रदर्शन हो । सन् २०२१–२२ को सिजन पनि इन्टर मिलान च्याम्पियन बनेको थियो ।
योसँगै इन्टरले रोमासँग नौ पटक उपाधि जितेको रेकर्डसँग बराबरी गरेको छ । यी दुई क्लबभन्दा अघि रहेको युभेन्टसले हालसम्म १४ पटक यो उपाधि जितेको छ ।
