काठमाडौं । आइतबार सिंहदरबारमा बसेको मन्त्रिपरिषद बैठकले टीकापुर घटनामा संलग्न भएको आरोपमा जेल जीवन बिताइरहेका रेशम चौधरीलाई आम माफीका लागि राष्ट्रपति रामचन्द्र पौडेललाई सिफारिस गरेको छ।
मन्त्रिपरिषदको सिफारिसअनुसार गणतन्त्र दिवसका अवसरमा राष्ट्रपति रामचन्द्र पौडेलले भोलि (सोमबार) चौधरीलाई आममाफी दिनेछन्।
शुक्रवार राष्ट्रपति पौडेलले चौधरीलाई सजायमाफी दिने गृहको प्रस्तावलाई ‘कानुन अनुसार गर्नु’ भन्दै गृह मन्त्रालयमै फिर्ता गरेका थिए। राष्ट्रपतिको उक्त निर्णयपछि सरकारलाई आम माफीका लागि सिफारिस गर्ने बाटो खुलेको थियो।
सरकारकी प्रवक्ता एवं सञ्चार तथा सूचना, प्रविधिमन्त्री रेखा शर्माले सञ्चारकर्मीसँग भनिन्- ‘रेशमलाल चौधरी, जो अहिले कारागारमा हुनुहुन्छ, जसको अस्ति भर्खर उच्च अदालतको निर्णयलाई सर्वोच्च अदालतले सदर गरेको अवस्था छ, राष्ट्रपति कार्यालयले सोधेका केही बिषयहरु सम्वोधन गरेर राष्ट्रपति कार्यालयमा बाकी सजायँ मिनाहा गर्न सिफारिस गर्ने निर्णय गरेको छ ।’
उनका अनुसार आजको मन्त्रिपरिषद बैठकले यसरी सिफारिस गर्दा सरकारले कुनै कानुनी उलंघन गरिएको छैन । ‘हामीले बिभिन्न कानुन ब्यावसायसँग गरेको सल्लाह अनुसार कानुनत: ठिक छ भन्ने कुरा छ, अहिले हामीले यो निर्णय कानुन भन्दा बाहिर गएर गरेका छैनौं ।’ उनले भनिन् ।
चौधरीको पार्टी नागरिक उन्मुक्ति सरकारमा सहभागी छ। पत्नी तथा नागरिक उन्मुक्तिकी अध्यक्ष रन्जिता श्रेष्ठले चौधरीलाई रिहा गर्न लगातार लविङ गर्दै आएकी छिन्।
यसअघि उच्च अदालतको फैसललाई सदर गर्दै सर्वोच्च अदालतले चौधरीलाई जन्मकैदको फैसला गरेको थियो। २०७२ भदौ ७ गते टीकापुरमा भएको प्रदर्शनले हिंसात्मक रूप लिँदा ७ जना प्रहरीसहित १ जना दूधे बालकको ज्यान गएको थियो ।
टीकापुर घटनामा रेशम चौधरी दोषी रहेको भन्दै जिल्ला अदालत कैलाली र उच्च अदालत दीपायलले उनलाई जन्मकैदको सजाय सुनाएका थिए। गत जेठ २ गते सर्वोच्च अदालतले उच्च अदालतको फैसला सदर गरेको थियो ।
