काठमाडौं । लगातार सातौं दिनसम्म बढेको शेयर बजार फेरि ओरालो लागेको छ । साताको कारोबार पहिलो दिन शेयर बजार मापक सूचक (नेप्से) १७.३८ अंकले घटेर १९४१.७४ विन्दुमा झरेको हो ।
नेपाल स्टक एक्सचेन्जका अनुसार आइतवार २७० कम्पनीको २ अर्ब ६३ करोड ९६ लाख ५९ हजार ४९९रुपैयाँ बराबरको ७० लाख ५० हजार ३९ कित्ता शेयर किनबेच भएका छन् ।
अघिल्लो दिनको तुलनामा कारोबार रकम बढेको छ । बुधवार १ अर्ब ८७ करोड ३० लाख १८ हजार २४ रुपैयाँ बराबरको शेयर किनबेच भएको थियो ।
आज कारोबारमा आएका १३ वटा उपसमूहमध्ये उत्पादनमूलक र सामूहिक लगानी कोषबाहेक अरु सबै समूहको परिसूचक राताम्मे भएको छ । होटल उपसमूहको परिसूचक सबैभन्दा धेरै २.७७ प्रतिशतले घटेको छ ।
आज शिवम् सिमेन्टको शेयरमा लगानीकर्ताको उच्च आकर्षण देखिएको छ । यसको झन्डै २२ करोड रुपैयाँ बढीको सेयर किनबेच भएको छ ।
घट्दो बजारमा पनि आज दुई कम्पनीको शेयर मूल्यमा पोजेटिभ सर्किट लागेको छ । आत्मनिर्भर लघुवित्त र युनियन लाइफ इन्स्योरेन्सको शेयर मूल्य १० प्रतिशतले बढेको छ ।
