काठमाडौं । सरकारले आज आगामी आर्थिक वर्ष २०८०/८१ को बजेट ल्याउने भएको छ । अर्थमन्त्री डा. प्रकाशशरण महतले अपराह्न ४ बजे संघीय संसद्को संयुक्त बैठकमा बजेट प्रस्तुत गर्ने कार्यतालिका रहेको छ ।
आगामी वर्षका लागि स्रोत अनुमान समितिले १६ खर्ब ८८ अर्ब रूपैयाँको बजेट सीमा तोके पनि अर्थमन्त्री महतले १७ खर्ब बढी आकारको बजेट ल्याउने तयारी गरेको जनाइएको छ ।
आउँदो बजेटमा साधारण खर्च कटौती, पुँजीगत खर्चमा वृद्धि, अनावश्यक सरकारी संरचनाको खारेजी तथा मर्जर, प्रत्यक्ष वैदेशिक लगानीको सीमा हटाउने लगायतका विषयलाई प्राथमिकतामा राखिएको छ ।
चालु आवमा लक्ष्यको आधा मात्रै राजस्व उठे पनि सरकरले राजस्व संकलनको लक्ष्य ठूलो राख्ने भएको छ । आगामी वर्ष साढे १२ खर्ब बढी राजस्व संकलन गर्ने सरकारले लक्ष्य राखेको छ ।
स्रोत व्यवस्थापनका लागि नपुग रकम आन्तरिक र बाह्य ऋणबाट उठाउने भएको छ ।
राजस्वको स्रोत खुम्चिएको अवस्थामा बजेट खर्च व्यवस्थापनका स्रोतको रुपमा वैदेशिक सहायता र ऋणलाई नै पहिलो प्राथमिकतामा राखेको जनाइएको छ । जेठको १५ गते नै बजेट ल्याउनुपर्ने बाध्यकारी संवैधानिक व्यवस्था छ ।
