काठमाडौं । शेयर बजार दोहोरो अंकले बढेको छ । साताको कारोबारको तेस्रो दिन शेयर बजार मापक सूचक (नेप्से) १७.७९ अंकले बढेर २०१५.९८ विन्दुमा पुगेको हो । नेपाल स्टक एक्सचेन्जका अनुसार मंगलवार २७७ कम्पनीको १ अर्ब ३३ करोड २५ लाख ६४ हजार ७६९ रुपैयाँ बराबरको शेयर किनबेच भएका छन् ।
आज कारोबारमा आएका १३ वटै उपसमूहको परिसूचकमा हरियाली छाएको छ । फाइनान्स उपसमूहको परिसूचक सबैभन्दा धेरै २.२१ प्रतिशतले बढेको छ ।
आज कुमारी बैंकको प्रमोटर शेयर सर्वाधिक कारोबार भएको छ । यसको साढे २८ करोड रुपैयाँ बढीको शेयर किनबेच भएको छ । त्यस्तै, युनाइटेड अजोड इन्स्योरेन्स ५ करोड र शिवम् सिमेन्ट साढे ४ करोड बढीको कारोबार हुँदै शिर्ष तीनमा रहे ।
दोहोरो अंकले बढेको बजारमा कुथेली बुखरी स्मल हाइड्रोपावरको शेयर मूल्यमा पोजेटिभ सर्किट लागेको छ । यसका शेयर धनीले १० प्रतिशत कमाएका छन् ।
त्यसैगरी, इङवा हाइड्रोपावर, माइखोला हाइड्रोपावर, मकर जितुमाया र छ्याङ्दी हाइड्रोपावरको शेयर मूल्य ८ प्रतिशतले बढेको छ ।
