काठमाडौं । गोकर्णेश्वर नगरपालिका–३ जगडोलमा गोली प्रहार गरी प्रहरी टोलीले तीन जना लुटेरालाई नियन्त्रणमा लिएको छ।
प्रहरीको गोली लागेर सिन्धुली कमलामाई नगरपालिका वडा नम्बर २ घर भएका ३६ वर्षीय अमर घलान घाइते छन्। उनको दाहिने खुट्टाको तीघ्रा र घुँडामुनि गोली लागेको प्रहरीले जनाएको छ।
उनीहरु विभिन्न ठाउँमा तस्करी र अवैध सुन किन्न, खोज्न हिँड्ने र सुन भेटिएपछि पेस्तोल देखाएर लुट्ने समूहका नाइके भएको प्रहरी भनाइ छ । उक्त समूहका सर्लाही घर भएका अन्दाजी ३६ वर्षीय शन्त लामा र सिन्धुपाल्चोक घर भएका अन्दाजी ३० वर्षका जितेन लामालाई २ वटा मोटरसाइकलसहित प्रहरीले नियन्त्रणमा लिएको छ।
उनीहरुको साथबाट १ थान पेस्तोल र ७ राउण्ड गोली भेटिएको काठमाडौं उपत्यका प्रहरी कार्यालय रानीपाखेरीले जनाएको छ।
