काठमाडौं । नेपाल ‘ए’ र आयरल्याण्ड ‘ए’ बीचको बिहीबारलाई तय भएको पहिलो टी-२० क्रिकेट खेल ‘रि–सेड्यूल’ गरिएको छ। अब उक्त खेल भोलि शुक्रबार दिउँसो २ बजे टियू अन्तर्राष्ट्रिय क्रिकेट मैदानमा हुनेछ।
आयरल्यान्ड ‘ए’ ले नेपाल ‘ए’ सँग तीनवटा टी–२० र तीनवटा एकदिवसीय प्रतियोगिता खेल्ने कार्यक्रम रहेको छ । यसअघि नेपालको राष्ट्रिय टोली र आयरल्यान्ड ‘ए’ बीच खेलिएको दुई खेलको टी–२० शृंखलामा नेपाल २–० ले विजयी भएको थियो ।
आइतबार नेपाल क्रिकेट संघले विनोद भण्डारीको कप्तानीमा १५ सदस्यीय टोलीको घोषणा गरेको थियो। यस अगाडि सिरिजका लागि क्यानले प्रारम्भिक टिममा बोलाएका खेलाडीबाट नै टी-२० र एकदिवसीय सिरिज खेल्ने नेपाल ‘ए’टिमको घोषणा गरेको हो। नेपालको कप्तानी भण्डारी र आयरल्यान्डको निल रकले गर्नेछन्।
टी-२० खेल्ने टिम नेपाल‘ए’मा कप्तान भण्डारीसँगै लोकेश बम, देव खनाल, पवन सर्राफ, किरण ठगुन्ना, आरिफ शेख, अर्जुन घर्ती, नारायण जोशी, बशिर अहमद, रसिद खान, सागर ढकाल, बिपिन खत्री, कमल सिंह ऐरी, हेमन्त धामी र विकास आग्री रहेका छन्।
