काठमाडौं, १७ मंसिर । प्रमुख प्रतिपक्षी दल नेकपा एमालेले फेरि पनि संसद चल्न नदिने भएको छ।
दोस्रो कार्यकालका लागि अध्यक्ष निर्वाचित भएपछि केन्द्रीय कार्यालय थापाथलीमा पदभार ग्रहणका क्रममा अध्यक्ष केपी शर्मा ओलीले यस्तो संकेत गरेका हुन्।
एमालेले निष्कासन गरेका व्यक्तिहरूलाई संसदमा राखेर कुनै पनि हालतमा स्वीकार गर्न नसकिने पनि उनले बताए।
उनले भने, ‘हामीले निष्कासन गरेका व्यक्तिहरू संसदभित्र राखेर कसरी संसद् चल्न सक्छ ?,’ एमालेले निष्कासन गरेका व्यक्तिहरु फेरि संसदमा आउँछन् भने हामी स्वीकार गर्न सक्दैनौं।’
उनले गठबन्धनबाट देश अहिले नचलेको भन्दै छिटोभन्दा छिटो ताजा जनादेशमा जानुपर्ने बताए । ओलीले अदालतमा देखिएको समस्या सत्तारुढ पाँच दलको गठबन्धनको विसंगतिका कारण भएको बताए ।
‘अदालतको हुर्मत लिने काम भएको छ । गलत फैसला गराउने र आफै हुर्मत लिने । कार्यपालिकाले न्यायपालिकालाई बर्वाद गरेको छ’ ओलीले भने, ‘गठबन्धनले हरेक क्षेत्रलाई गठबन्धनले निकम्मा बनायो । लोकतन्त्रका आधार भत्काउने काम भएको छ ।
राष्ट्रपति विद्या भण्डारीले आगामी मंसिर २८ गते संघीय संसद बैठक आह्वान गरेकी छन्।
नेकपमा एमालेले माधव नेपाल, झलनाथ खनाललगायतका १४ जना नेताहरूलाई कारबाही गरेको थियो। माधव नेपालको नेतृत्वमा नेकपा एकीकृत समाजवादी पार्टी दर्ता भई संसदमा दर्ता भइसकेको छ।
