काठमाडौं । पाकिस्तानका प्रधानमन्त्री इमरान खानविरुद्ध दर्ता भएको अविश्वास प्रस्ताव खारेज भएको छ।
संसदका उपसभामुख क्वासिम खान सुरीले संविधानको धारा ५ विपरीत रहेको भन्दै प्रधानमन्त्री खानविरुद्ध दर्ता भएको अविश्वास प्रस्ताव खारेज गरेको पाकिस्तानी सञ्चारमाध्यम डनले जनाएको छ।
संसदको आइतबारको बैठकको अध्यक्षता गरेको उपसभामुख सुरीले अविश्वास प्रस्ताव नै संविधानविपरीत रहेको जिकिर गर्दै खारेज गरेका हुन्।
विपक्षी दलले सभामुख असद कैसरविरुद्ध अविश्वास प्रस्ताव दर्ता गरेपछि आइतबारको बैठकको अध्यक्षता उपसभामुखले गरेका हुन्।
त्यसपछि इमरान खानले देशलाई सम्बोधन गर्दै राष्ट्रपतिसँग संसद भंग गर्दै ९० दिनभित्र चुनावको सिफारिस गरेका छन्।
नेशनल एसेम्बलीमा विपक्षीको अविश्वास प्रस्ताव खारेज भएपछि पाकिस्तानका प्रधानमन्त्री इमरान खानले देशलाई सम्बोधन गर्दै मध्यावधि चुनावको तयारी गर्न भनेका छन्। उनले संसद भंग गर्न गरिएको सिफारिस राष्ट्रपतिकहाँ पठाएका छन्।
