काठमाडौं, २० चैत । प्रमुख प्रतिपक्ष दल नेकपा एमालेका अध्यक्ष केपी शर्मा ओलीले प्रधानमन्त्री शेरबहादुर देउवाको भारत भ्रमणबारे कटाक्ष गरेका छन् ।
आइतबार काठमाडौंमा आयोजित पार्टीको कार्यक्रममा सम्बोधन गर्दै ओलीले देउवाको भारत भ्रमणका क्रममा दिल्लीस्थित नेपाली दूतावासमा लिपुलेक, लिम्पियाधुरा र कालापानीसहितको नक्सा हटाइए भन्दै कटाक्ष गरेका हुन् ।
आफ्नाे सरकारले जारी गरेकाे चुच्चे नक्साबारे चासाे नदेखाएकाे उल्लेख गर्दै ओलीले भनेका छन्, ‘सरकारका सय दिन भनेर किताब ल्याउनुभयाे शेरबहादुरजीले; त्यहाँ त चुच्चे नक्सा नै गायब थियाे । फेरि हिजाे दूतावासमा पनि बुच्चे नक्सा झुन्ड्याइएकाे थियाे ।’
यसअघि ओलीले प्रधान मन्त्री देउवालाई साेधे— ‘के याे साधारण कुरा हाे ? तपाईं चुच्चे नक्सा हटाएर फर्किने हाे ?’ याेभन्दा राष्ट्रकाे दलाली केही नहुने ओलीकाे भनाइ थियाे ।
‘प्रधानमन्त्री फर्किनुभन्दा अगाडि दिल्ली दूतावासमा हाम्रो संविधानले भनेको नक्सा, हाम्रो संसदले संविधान संशोधन गरेर राखेको नक्सा किन राखिएन ?,’ ओलीले प्रश्न गरेका छन् ।
त्यस्तै उनले नेपालमा तीन प्रकारका कम्युनिस्टहरू रहेको बताए । ‘दार्शनिक धरातल भएका र त्यसलाई व्यवहारमा अपनाउने पहिलो वर्गका कम्युनिस्ट छन् ।
दोस्रो, प्रगतिशील धारका कम्युनिस्ट सैद्धान्तिक वैचारिक तहका कम्युनिस्ट हुन्,’ उनले भने, “हामीकहाँ मान–सम्मान पुगेन भने पार्टी ध्वस्त पार्न तयार हुने कम्युनिस्ट पनि छन् ।’
उनले नेकपा (एकीकृत समाजवादी)का अध्यक्ष माधवकुमार नेपालप्रति लक्षित गर्दै नाफा–नोक्सानको राजनीति गर्ने पनि राजनीतिज्ञ भएको बताए ।
