काठमाडौं । कतार विश्वकप सुरु हुन एक दिन बाँकी छ। मैदानमा खेल सुरु हुनुअघि नै मैदान बाहिर भित्र कसलाई जिताउने खेल शुरु भएको दाबी गरिएको छ।
रिपोर्टअनुसार आयोजक देश कतारले म्याच फिक्सिङ गरेको आरोप लगाइएको छ। कतारले आफ्नो पहिलो खेलमा नै इक्वेडरलाई घुस दिएको आरोप लागेको छ।
ब्रिटिश मिडल इस्ट सेन्टर फर स्टडिज तथा रिसर्च का क्षेत्रीय निर्देशक अमजद ताहाले फिक्सिङ गर्न लागिएको बलियो प्रमाण प्राप्त भएको बताएका छन्।
कतारले आफ्नो पहिलो खेलका लागि लाखौँ डलर खर्चिएको दाबी अन्तरराष्ट्रिय सञ्चारमाध्यमले गरेका छन्। उनका अनुसार कतारले विपक्षी खेलाडीलाई पैसा दिएर कमजोर खेल खेल्नका लागि प्रेरित गरेको बताइएको छ।
सूत्रको हवाला दिँदै जानकारी दिइएअनुसार इक्वेडरका आठ खेलाडीलाई ७.४ मिलियन अमेरिकी डलर (करिब ९२ करोड) रुपैयाँ दिएको जनाइएको छ। त्यसका लागि यो खेल कतारले १-० ले जित्ने र खेलको निर्णायक गोल दोस्रो हाफमा हुने दाबी समेत गरिएको छ।
फिफा विश्वकपमा म्याच फिक्सिङ रोक्नका लागि एफबिआइको सहयोग मागिएको छ। किनकि फिफाका अनुसार विश्वकपमा विश्वभर करिब १०० बिलियन डलर बराबरको रकम दाउ लगाइन सकिने जनाइएको छ।
म्याच फिक्सिङ रोक्नका लागि फिफाले पहिलो पटक विशेष टाक्सफोर्स बनाएको छ। जसमा बिटिङ मार्केटको मनिटरिङ गर्ने अन्तर्राष्ट्रिय फर्महरु स्पोर्टसराडार, इन्टरपोल, इन्टरनेशनल बिटिङ इन्ट्रिगिटी एसोसिएशन तथा एफबीआईलाई सहभागी गराइएको छ।
