काठमाडौं । शेयर बजार झिनो अंकले बढेको छ । साताको कारोबार पहिलो दिन शेयर बजार मापक सूचक (नेप्से) ५.८८ अंकले बढेर १८८३.२० विन्दुमा पुगेको हो ।
नेपाल स्टक एक्सचेन्जका अनुसार आइतवार २७३ कम्पनीको १ अर्ब ६० करोड ४ लाख ९२ हजार ७३१ रुपैयाँ बराबरको ४८ लाख २८ हजार ७७६ कित्ता शेयर किनबेच भएका छन् ।
विहीवारको तुलनामा कारोबार रकममा पनि सुधार आएको छ । त्यसदिन १ अर्ब ४७ करोड ४७ लाख ६५ हजार ३८८ रुपैयाँको शेयर किनबेच भएको थियो ।
कारोबारमा १३ उपसूचकमध्ये ४ वटा घटेको छ भने अन्य बढेर हरियाली छाएको छ। होटल उपसमूहको परिसूचक सबैभन्दा धेरै २.६४ प्रतिशतले बढेको छ ।
आज दुई कम्पनीको शेयरमूल्यमा उच्च वृद्धि भएको छ । राष्ट्रिय बीमा संस्थान र आत्मनिर्भर लघुवित्त वित्तीय संस्थाको शेयरमूल्य १० प्रतिशतले बढेको छ ।
आज शिवम् सिमेन्टको सर्वाधिक कारोबार भएको छ । यसको ६ करोड रुपैयाँ बढीको शेयर किनबेच भएको छ । त्यस्तै, राष्ट्रिय बीमा कम्पनी ५ करोड र तारागाउँ रिजेन्सी होटलको ४ करोड बढीको कारोबार भएको छ ।
