काठमाडौं । एकैपटक ३०० बढी चालक दलका सहस्यहरूले बिरामी बिदा लिएपछि एयर इण्डिया र एयर इण्डिया एक्सप्रेस एयरलाइन्सका ८० भन्दा बढी उडान रद्द भएका छन् ।
मंगलबार रातिदेखि बुधबार बिहानसम्म ८० भन्दा बढी उडान रद्द भएका हुन् । बुधबार दिउँसोको लागि तय भएका थप उडानहरू पनि रद्द हुन सक्ने अनुमान गरिएकाे छ ।
दुवै एयरलाइन्सले सूचना जारी गर्दै यात्रीलाई बुधबारको आफ्नो विमानको उडान सम्बन्धी पूर्वजानकारी लिएरमात्र विमानस्थल आउन सूचित गरेका छन् ।
‘हाम्रा सिनियर क्रुको एउटा वर्गले हिजो राति अन्तिम क्षणमा बिरामी भएको सूचना दिएका कारण उडानमा ढिला भयो भने कयौँ उडान रद्द गरियो । हामी यो घटनाको पछाडि रहेका कारण बुझ्नका लागि क्रु मेम्बरसँग कुरा गरिरहेका छौँ । यात्रीहरूमा हुने असुविधा कम गर्नका लागि हाम्रो टिमले तीव्र रुपमा काम गरिरहेको छ,’ एयर इन्डिया एक्सप्रेसले विज्ञप्ति जारी गर्दै भनेको छ ।
दुवै एयरलाइन्सका कर्मचारीहरूले सदस्यहरूले बिरामी बिदा लिएको भए पनि आफ्नो जागिर धरापमा पर्न लागेकाले विरोधमा उत्रिएको जनाइएको छ । एयर इन्डिया र एयर इन्डिया एक्सप्रेस एयरलाइन्स आपसमा गाभिन लागेका छन् । त्यसैले दुवै एयरलाइन्सका कर्मचारीहरू अघोषित रुपमा आन्दोलनमा उत्रिएका हुन् ।
