अमेजनका प्रमुख बेजोश विश्वकै धनी, विनोद चौधरीको सम्पत्ति २० अर्बले बढ्यो

२२ फाल्गुन २०७५ १७:१३

काठमाडौं, २२ फागुन । यस अमेरिकी अनलाइन सपिङ कम्पनी एमजनका संस्थापक जेफ बेजोश विश्वको सर्वाधिक धनी बनेका छन् । अमेरिकी पत्रिका फोब्र्सले हरेक वर्ष विश्वका धनाढ्यहरुको सूचि सार्वजनिक गर्छ । सन् २०१९ का लागि सार्वजनिक धनाढ्य सूचीमा १ खर्ब ३१ अर्ब डलर सम्पत्तिसहित बेजोश पहिलो स्थानमा रहेका छन् । फोब्र्सका अनुसार उनको सम्पत्ति गत वर्षभन्दा १९ अर्ब डलरले बढ्यो । यो वर्ष फोब्र्समा सूचीकृत धनाढ्य व्यक्तिको कुल सम्पत्ति ८ दशमलव ७ ट्रिलियन डलर देखिएको छ । यस वर्ष कूल सम्पत्ति भने घटेको देखिएको छ । गत वर्ष भन्दा यस वर्ष ४० करोडले सम्पत्ति घटेको पत्रिकाले उल्लेख गरेको छ । यस वर्ष धनाढ्य सूचीबाट ५५ जना आउट भए ।

अर्बपतिको दोस्रो स्थानमा प्रविधि कम्पनी माइक्रोसफ्टका सह–संस्थापक बिल गेट्स रहेका छन् । उनीसँग ९६ अर्ब ५० करोड डलरको सम्पत्ति छ । उनको सम्पत्ति गत वर्षको तुलनामा ६ अर्ब ५० डलरले वृद्धि भएको पत्रिकाले उल्लेख गरेको छ । अमेरिकी बहुराष्ट्रिय कङ्ग्लोमेरेट कम्पनी वर्कशायर हाथवेका प्रमुख कार्यकारी अधिकृत वारेन वफेट विश्वको तेस्रा धनी व्यक्ति बनेका छन् । उनको सम्पत्ति गत वर्षको तुलनामा डेढ अर्ब डलरले घटेको छ । अहिले उनीसँग ८२ अर्ब ५० करोड डलर रहेको फोब्र्सले उल्लेख गरेको छ । फ्रान्सको लक्जरी ब्राण्ड एलभिएमएसका प्रमुख कार्यकारी बर्नाड आर्नाेल्ट ७६ अर्ब डलर सम्पत्तिसहित चौथो स्थानमा छन् ।

भारतका धनी अम्बानी
रिलायन्स इण्डष्ट्रिजका अध्यक्ष मुकेश अम्बानी भारतका सबैभन्दा धनी व्यक्ति देखिएका छन् । विश्वव्यापी धनाढ्य सूचीमा १३औं स्थानमा रहेका अम्दानी भारतका भने पहिलो धनी व्यक्ति हुन् । १ सय ६ भारतीय अर्बपति सूचिमा अटाएका छन् । अम्बानी धनाढ्य सूचीमा पनि गत वर्षको तुलनामा ६ स्थान माथि आए । उनीसँग अहिले ५० अर्ब डलर सम्पत्ति छ । उनका भाई अनिल अम्बानी पनि धनाढ्य सूचिमा छन् । उनी विश्वव्यापी सूचिको १३ सय ३९औं स्थानमा छन् ।

विनोद चौधरीको फड्को
विनोद चौधरी नेपालका एकमात्र अर्बपति हुन् । यस सूचिमा १३ सय ४९औं स्थानमा उनी छन् । चौधरी गत वर्षको तुलनामा २ सय १२ स्थान माथि उक्लिए । गतवर्ष उनी १५ सय ६१औं स्थानमा थिए । उनले यस वर्ष २० करोड डलर सम्पत्ति थप कमाएको फोब्र्सले उल्लेख गरेको छ । चौधरीसँग एक अर्ब ७० करोड डलर सम्पत्ति छ ।

विश्वका १० धनी व्यक्ति

१. जेफ बेजोश
प्रमुख, एमजन
१ खर्ब ३१ अर्ब डलर