नयाँ दिल्ली । १६ डिसेम्बर २०१२ को रात २३ वर्षिय छात्रा निर्भयामाथि सामुहिक बलात्कार भयो । बर्बर बलात्कारपछि गम्भीर घाइते भएकी उनको उपचारका क्रममा निधन भयो ।
यस घटनामा संलग्न ६ जनामध्ये चार जनालाई आगामी तीन मार्चमा फाँसीको सजाय हुँदैछ ।
एक जनाले जेलमै आत्महत्या गरिसकेका छन् भने एक जना भने घटना हुने समयमा नाबालक रहेका कारण सुधार गृहमा पठाइएको छ । चार जना भने यतिबेला मृत्युको अन्तिम घडी कुरिरहेका छन् ।
उनीहरुलाई अब परिवारसँग अन्तिम भेटका लागि अवसर दिइने भएको छ । जेल प्रशासनका अनुसार मुकेश कुमार सिंह र पवन गुप्ताले परिवारसँग भेटिसकेका छन् ।
अब अक्षय र विनय कुमार शर्मालाई अन्तिम भेटको अवसर दिइने भएको छ । चार वटै दोषिको फाँसी निश्चित भएका कारण परिवारसँग अन्तिम भेटको अवसर दिन थालिएको हो ।
उनीहरुको फाँसीको मिति ३ मार्च बिहान ६ बजे तोकिएको छ । यसअघि अदालतले मृत्युदण्डको सजाय सुनाइसकेपछि दोषिले राष्ट्रपतिसमक्ष याचिका गरेका थिए ।
तर, याचिका खारेज भइसकेका कारण मृत्युदण्ड पक्का भएको हो । उनीहरुलाई यतिबेला अहिले दिल्लीको पटियाला हाउसमा राखिएको हो । यो मृत्युदण्डका सजाय सुनाइएका दोषिलाई राखिने जेल हो ।
एजेन्सी
