काठमाडौं, १७ बैशाख । जापानी सम्राट आकिहितोले टोकियोको इम्पेरियल दरबारमा मंगलबार आयोजित ऐतिहासिक समारोहमा राजगद्दी त्यागेको घोषणा गरेका छन् ।
राजगद्दी त्यागको घोषणा समारोहमा ३०० भन्दा बढीको उपस्थिती रहेको थियो । समारोहमा प्रधानमन्त्री सिन्जो आबे, युवराज नारुहितो र युवराज्ञी मासाको लगायतको उपस्थिती रहेको थियो ।
उनी पछिल्लो दुई सय वर्षयता जापानको राजगद्दी त्याग्ने पहिलो सम्राट हुन् । सेरेमोनियल राजतन्त्र भएपनि जापानीहरुले राजसंस्थालाई ठूलो आस्था र सम्मान व्यक्त गर्छन् ।
किन त्यागे राजगद्दी ?
८५ वर्षीय स्रमाट आकिहितोले स्वास्थ्यलाई कारण देखाउँदै राजपाठ त्यागेको घोषणा गरेका हुन् ।
खराब स्वास्थ्यका कारण गद्दी त्याग्न चाहेको मनसाय सम्राट आकिहितोले केही वर्ष अघि नै व्यक्त गरेका थिए ।
उनको सन् २००३ मा प्रोस्टेट क्यान्सरको सर्जरी गरिएको थियो र सन् २०१२ मा मुटुको बाइपास सर्जरी गरिएको थियो ।
को बन्नेछन् नयाँ सम्राट ?
आकिहितोले राजगद्दी त्यागेपछि बुधवबार नै उनका जेठा छोरा युवराज नारुहितोले जापानी राजगद्दी सम्हाल्ने भएका छन् ।
जापानमा सम्राट अनुसार युगको नामकरण गरिन्छ । मे १ बाट युवराज नारुहितोले जापानी राजगद्दी सम्हाले पछि जापानी क्यालेण्डरमा ‘रेइवा’ नामको नयाँ शाही युग सुरु हुने बताइएको छ ।
यसअघि सन् १९८९ मा अकिहितोले गद्दी सम्हालेपछि तीन दशकसम्मे ‘हेसेइ’ युग चलेको थियो ।
जापानका १२६ औँ सम्राट बन्न लागेका नारुहितो ५६ वर्षका भए । उनले बेलायतको प्रसिद्ध अक्सफोर्ड विश्वविद्यालयबाट शिक्षा हासिल गरेका छन् । युवराज्ञी मासाकोसँग उनको विवाह भएको थियो ।
युवराज नारुहितो र युवराज्ञी मासाकोका एक्ली सन्तानको रूपमा राजकुमारी आइकोको जन्म सन् २००१ मा भएको थियो तर, जापानको वर्तमान कानुनले महिलालाई गद्दी आरोहण गर्न अनुमति दिएको छैन ।
नारुहितो सम्राट भएपछि उनका भाइ फुमिहितो युवराजका रूपमा राजगद्दीको उत्तराधिकारी हुनेछन् । त्यसपछि फुमिहितोका छोरा १२ वर्षिय राजकुमार हिसाहितो राजगद्दीको उत्तराधिकारी हुनेछन् ।
(एजेन्सीकाे सहयाेगमा)
