काठमाडौं, २४ चैत । एमाले प्रवेश गरेका व्यवसायी किशोर प्रधानलाई सरकारले नेपाल वायुसेवा निगमको सञ्चालकमा नियुक्त गरेको छ ।
प्रधान दुई साताअघि मात्रै एमाले प्रवेश गरेका थिए । संस्कृति, पर्यटन तथा नागरिक उड्डयनमन्त्री भानुभक्त ढकालले उनलाई निगमको सञ्चालकमा नियुक्त गरेको मन्त्री ढकालको सचिवालयले जानकारी गराएको छ ।
नेपाल वायुसेवा निगम ऐन २०१९ को परिच्छेद २ को दफा ४ को उपदफा १ बमोजिम उनलाई निगमको सञ्चालकमा नियुक्त गरिएको सचिवालयले जानकारी गराएको छ । उनको कार्यकाल ४ वर्षको हुनेछ ।
नेपाल उद्योग वाणिज्य महासंघका पूर्व उपाध्यक्ष प्रधानसहितका उद्योगी–व्यवसायी चैत ६ मा एमाले प्रवेश गरेका थिए । प्रधान नेपाल उद्योग वाणिज्य महासंघका पूर्वउपाध्यक्ष हुन् । महासंघको गएको अधिवेशनमा चन्द्रप्रसाद ढकालसँग वरिष्ठ उपाध्यक्षमा पराजित भएका थिए ।
