काठमाडौं । सन् २०२२ मा कतारमा आयोजना हुने फिफा विश्वकप फुटबलको जारी छनोट खेल खेल्ने अर्जेन्टिनी टोली घोषणा भएका छ । दक्षिण अमेरिकी पावर हाउस अर्जेन्टिनाले ३ खेलका लागि टोली घोषणा गरेको हो ।
अर्जेन्टिनी राष्ट्रिय टिमका मुख्य प्रशिक्षक लियोनल स्कालोनीले ३० सदस्यीय टोली घोषणा गरेका हुन् । विश्वकप छनोटमा दक्षिण अमेरिकी महादेशका १० देशले प्रतिस्पर्धा गरिरहेका छन् । सबै टिम एकै समूहमा छन् ।
अर्जेन्टिनाले अर्को साताबाट तेस्रो चणमा ३ खेल खेल्ने छ । उसले यसअघि २ चरणमा गरेर ६ खेल खेलिसकेको छ ।
को को परे टोलीमा ?
प्रशिक्षक स्कालोनीले यसपटक ब्राजिलविरुद्ध पनि खेल्नुपर्ने भएकाले मुख्य खेलाडी सबैलाई अटाएका छन् । यसअघि टोलीमा नरहेका युवा फरवार्ड पाउलो डिबालाले कमब्याक गरेका छन् ।
फरवार्ड सर्जियो अगुएरो प्रशिक्षणका क्रममा घाइते भएपछि उनको ठाउँमा डिबालाले मौका पाएका हुन् । यसअघि कोपा अमेरिका कप खेल्ने टोलीमा पनि डिबाला परेका थिएनन् ।
अर्का स्टार फरवार्ड माउरो इकार्डी भने यसपटक पनि टोलीमा परेनन् ।
मेस्सीको कप्तानीमा कोपा जित्दाका स्टार गोलकिपर इमिलियानो मार्टिनेजदेखि निकोलास ओटामेन्डी, जुआन फ्योथ, रोड्रिगो डे पाउल, लियान्द्रो पाराडेश, जियोभानी लो सेल्सो, एन्जल डि मारिया लगायत समेटिएका छन् । फ्रन्ट लाइनमा कप्तान मेस्सीका साथमा डिबाला र लौटारो मार्टिनेज टोलीमा परेका छन् ।
तेस्रो चरणको पहिलो खेल अर्जेन्टिनाले सेप्टेम्बर ३ मा भेनेज्वेलासँग खेल्नेछ । दोस्रो खेल सेप्टेम्बर ६ मा ब्राजिलविरुद्द भिड्दा सेप्टेम्बर १० मा बोलिभियासँग खेल्नेछ ।
विश्वकप छनोटमा अर्जेन्टिना १२ अंक सहित तालिकाको दोस्रो स्थानमा छ ।
