काठमाडौं । सन् २०२२ मा हुने विश्वकप फुटबलको छनोटको खेलमा आज राति ब्राजिल र अर्जेन्टिनाको भिडन्त हुँदै छ । विश्वकपको दक्षिण अमेरिकी छनोटअन्तर्गको यो खेल नेपाली समयानुसार राति १२ः४५ बजे ब्राजिलस्थित साओ पाउलोमा हुनेछ ।
दक्षिण अमेरिकी छनोटमा आफ्नो विजयी यात्रा कायमै राखेको ब्राजिलले लगातार सात खेलमा जित निकाल्दै २१ अङ्क बनाएको छ । अर्जेन्टिनाले समान खेलमा १५ अङ्क जोडेको छ ।
चार खेलमा जित र तीन खेलमा बराबरी खेलेको अर्जेन्टिना अङ्क तालिकाको दोस्रो स्थानमा छ भने ब्राजिल पहिलो स्थानमा छ । यस खेलमा ब्राजिल अर्जेन्टिनामाथि जित दर्ता गर्दै आफ्नो विजयी यात्रा कायमै राख्ने योजनामा हुनेछ भने पाहुना टोली उसको विजयी यात्रालाई पूर्णविराम लगाउने दाउमा रहनेछ ।
आज ब्राजिलका प्रशिक्षक टिटेले स्टार फरवार्ड नेयमारसहितको टोली उतार्ने छन् । यता, अर्जेन्टिना पनि लियोनल मेस्सी कप्तानीमा उत्रिने भएका कारण खेल रोमाञ्चक हुने अपेक्षा गरिएको छ ।
