काठमाडौं, ७ भदौं । शेयर बजार झिनो अंकले बढेको छ । साताको कारोबारको तेस्रो दिन शेयर बजार मापक सूचक नेप्से १.८१ अंकले बढेर २०५४.९५ विन्दुमा पुगेको हो ।
नेपाल स्टक एक्सचेन्जका अनुसार मंगलवार २२२ कम्पनीको १ अर्ब ३३ करोड ३५ लाख ६० हजार ८५७ रुपैयाँ बराबरको ५२ लाख ३० हजार ७६३ कित्ता शेयर किनबेच भएका छन् ।
अघिल्लो दिनको तुलनामा कारोबार रकममा घटेको छ । सोमवार १ अर्ब ७२ करोड ६२ लाख ८७ हजार ४२९ रुपैयाँ बराबरको कारोबार भएको थियो । आज कारोबारमा आएका १३ वटा उपसमूह मध्ये ७ समूहको परिसूचक बढेको छ भने ६ समूहको घटेको छ । होटल समूह सबैभन्दा धेरै १.३४ प्रतिशतले घटेको छ ।
कारोबारमा आएका ३कम्पनीको शेयरमूल्यमा उच्च वृद्धि भएको छ । झिनो अंकले बढेको बजारमा तीन कम्पनीको शेयरमूल्यमा उच्च वृद्धि भएको छ ।
रुरु जलविद्युत कम्पनी, मन्दाकीनी हाइड्रोपावर कम्पनी र अप्पर हेवाखोला हाइड्रोपावर शेयरमूल्यमा सकारात्मक सर्किट लागेको हो । नेप्सेका अनुसार आज सिद्धार्थ इक्युटी फण्ड शेयरमूल्यमा सबैभन्दा बढी गिरावट भएको छ । यसको शेयरमूल्य ६ प्रतिशत भन्दा बढीले घटेको हो ।
त्यस्तै, कारोबारको आधारमा सबैभन्दा बढी हिमाल दोलखा हाइड्रोपावर कम्पनी लिमिटेडको भएको छ । यसको आज १४ करोड २१ लाख भन्दा बढीको कारोबार भएको छ ।
रिडी पावरको ७ करोड ६५ लाख र अपी पावरको ५ करोड ४५ लाखको कारोबार भएको छ ।
