काठमाडौं, १२ भदौ । काठमाडौं महानगरपालिकाका मेयर बालेन साहले महानगरपालिकाको सूचना अटेर गरी कानून मिच्नेहरुकै कारण प्रहरी खटाएर कारवाही अगाडी बढाउनु परेको बताएका छन् ।
आइतबार एक सूचना जारी गर्दै मेयर बालेनले महानगरभित्र कानून मिचेर बनाएका संरचना भत्काउने अभियान समेत जारी नै रहने बताएका हुन् ।
पार्किङको अनुमति लिएका भवनले महानगरपालिकाबाट विभिन्न सुविधा र सहुलियत पाइरहेको भन्दै त्यसलाई व्यवसायका रुपमा प्रयोग गर्न नमिल्ने पुनः स्पष्ट पारेका छन् । कानूनको कार्यान्वयन गर्नकै लागि ३५ दिने सूचना जारी गरिएको उनले स्मरण गराएका छन् ।
संरचना हटाउने अभियानलाई उनले महानगरपालिकामा अन्तर निहित अधिकारको प्रयोग भनेका छन् । उनले अगाडी भनेका छन्, ‘अब मिचाहा बर्गलाई कानून मिचिरहन र अझ मोटाइरहन दिने छैनौ ।’
