काठमाडौं । भृकुटीमण्डपमा विद्युतीय सवारीसाधनको प्रदर्शनी सुरु भएको छ । नाडा अटोमोबाइल एसोसिएसन अफ नेपालले ‘नाडा इभी एक्सपो २०२२’ आयोजना गरेको हो । शो आइतबारसम्म चल्ने छ ।
एक्स्पोको उद्घाटन अर्थमन्त्री जर्नादन शर्माले गरेका हुन् । एक्स्पोमा ग्राहकहरूले विभिन्न ब्रान्डका विद्युतीय चार पांग्रे, दुई पांग्रे र तीन पांग्रेबारे जानकारी प्राप्त गर्न सक्नेछन्।
नाडा इभी एक्स्पो २०२२ मा ठूला तथा साना गरी ५१ वटा स्टल र ब्लकहरू हुनेछन्। एक्स्पोमा सातवटा ब्रान्डका चार पांग्रे, एउटा तीन पांग्रे, १६ वटा ब्रान्डका दुई पांग्रे, ३ वटा ब्रान्डका टायर, २ वटा ब्रान्डका ब्याटरी, ९ वटा पार्टपुर्जा, ग्यारेज उपकरण कम्पनी एवम् अटो पत्रिका तथा ४ वटा वित्तीय संस्थाहरूको सहभागिता जनाएका छन् ।
एक्स्पोलाई व्यवस्थित बनाउन, प्रदर्शनी स्थलमा भिड–भाड कम गर्न एवं आगन्तुकहरुको भ्रमणलाई सहज बनाउन खल्ती एप मार्फत अनलाईन टिकट खरिद गर्न सकिने व्यवस्था मिलाइएको आयोजकले जनाएका छन् ।
नाडाले अनलाइन टिकट खरिदमा विशेष सहुलियत दर हुनुका साथै प्रत्येक टिकट खरिदमा खल्तीद्वारा २५ प्रतिशत क्यास ब्याकको अफर राखेको छ । टिकटको मूल्य विद्यार्थीहरूको लागि १५० र सामान्यमा दुई सय रूपैयाँ तोकिएको छ।
तस्वीर सौजन्य: हुन्डाई नेपाल
