काठमाडौं । शीर्ष ३ मा पुग्ने सम्भावना भने कायमै राखेको नेपालले २८ खेलमा २६ अंक जोडेको छ । अब ८ खेल खेल्न बाँकी छ । योसँगै लिग–२ अन्तर्गत आफ्ना सबै खेल पूरा गरेको स्कटल्याण्ड ६० अंकसहित शीर्षस्थानमा छ ।
तालिकाको तेस्रो स्थानको नामिबियाको ३४ खेलबाट ३७ अंक छ । लिग–२ का शीर्ष तीन टिमले आउँदो जुन १८ देखि जुलाई ९ सम्म जिम्बाब्वेमा हुने एकदिवसीय विश्वकप २०२३ को छनोट प्रतियोगितामा स्थान बनाउनेछन् । बाँकी चार टिमले मार्च २४ देखि अप्रिल ४ सम्म नामिबियामा हुने आईसीसी क्रिकेट विश्वकप क्वालिफायर प्लेअफ खेल्नेछन् ।
प्लेअफमा च्यालेन्ज लिगबाट आएका शीर्ष दुई टिम र लिग–२ को पुछारमा रहेका चार टिमले प्रतिस्पर्धा गर्नेछन् । नामिबियामा हुने विश्वकप क्वालिफायर प्लेअफका शीर्ष दुई टिमले पनि एकदिवसीय विश्वकप २०२३ को छनोट प्रतियोगितामा स्थान बनाउनेछन् ।
एकदिवसीय विश्वकप २०२३ को छनोट प्रतियोगितामा क्वालिफायर प्लेअफका शीर्ष दुई टिम, क्रिकेट विश्वकप लिग–२ का शीर्ष तीन टिम र आईसीसीको पूर्ण सदस्य राष्ट्रहरूको सुपर लिगबाट पुछारमा रहेका पाँच टिमले प्रतिस्पर्धा गर्नेछन् ।
