काठमाडौं, १३ असार । देशकै सबैभन्दा ठूलो जलविद्युत माथिल्लो तामाकोशी जलविद्युत आयोजनालाई राष्ट्रिय विद्युत प्रणालीमा जोड्ने काम सुरु हुँदैछ ।
यसअघि पटकपटक उत्पादन मिति तोकिएको आयोजनाको ४ सय ५६ मेगावाट क्षमताका ६ वटा युनिटमध्ये पहिलो युनिटबाट ७६ मेगावाट विद्युत् परीक्षण उत्पादन शुरु गर्न लागिएको हो । तामाकोशी स्वदेशी लगानीमा निर्माण भएको देशकै सबैभन्दा ठूलो जलविद्युत आयोजना हो।
आइतबारदेखि राष्ट्रिय विद्युत प्रणालीमा जोड्ने काम १९ गते शनिवारसम्म लाग्ने र त्यसका लागि एक हप्ता खिम्ती लामोसाँघु १३२ केभी प्रसारण लाइनबाट भइरहेको बिजुली आपूर्ति बन्द हुने नेपाल विद्युत प्राधिकरणले जनाएको छ ।
असार पहिलो साता वर्षाले चीनतर्फ पर्ने तामाकोशीको सहायक नदी पहिरोले थुनिएपछि तामाकोशीको जलाशय खाली गरिएको हो । जलाशय भरिएलगत्तै सुरुङमा पानी भरेर पुनः परीक्षण शुरु गरिने समेत आयोजनाले जनाएको छ ।
आयोजनाको सुरुङ, जलाशय, बाँध लगायतका भौतिक तथा अन्य प्राविधिक संरचनाको परीक्षण यसअघि नै भइसकेको छ । वैशाखभित्रै पहिलो युनिटबाट नियमित विद्युत उत्पादन सुरु हुने अनुमान गरिए पनि केही ढिलो गरेर व्यवसायिक उत्पादन गर्न लागिएको हो । अब कुनै पनि समस्या नरहेको आयोजनाले जनाएको छ ।
तामाकोशीको बिजुली प्रसारण लाइनमा जोड्ने क्रममा ढल्केबरदेखि कोहलपुरसम्मका सबस्टेशनबाट वितरित विद्युत केही समय कटौती हुन सक्ने नेपाल विद्युत प्राधिकरणले जनाएको छ । यसबाट केही समय काठमाडौं उपत्यकाका ग्राहक समेत प्रभावित हुनसक्ने जनाइएको छ ।
तामाकोशीको बिजुली तामाकोशी करिडोर हुँदै खिम्तीमा बनाइएको नयाँ सबस्टेशनमा जोडिने भएको छ । खिम्ती सबस्टेशनमार्फत् नै उत्पादित बिजुली राष्ट्रिय प्रसारणमा जोडिने छ।
यसअघि तामाकोशी करिडोरबाट आएको बिजुली सिधै ढल्केबर सबस्टेशन लाने गरी खिम्ती सबस्टेशनमार्फत जोडिएको थियो ।
आयोजनाबाट कुल ४५६ मेगावाट बिजुली उत्पादन गरिने छ । पिकिङ रन अफ रिभर’ प्रकृतिको आयोजनामा ६ टर्बाइन रहेेका छन् । प्रत्येक टर्बाइनबाट ७६ मेगावाट विद्युत् उत्पादन हुनेछ ।
२०६८ मा निर्माण शुरु भएर २०७२ मा सम्पन्न गर्ने लक्ष्य राखिएको यो आयोजना निर्धारित समयभन्दा ६ वर्ष ढिलोगरी निर्माण सम्पन्न हुँदै छ।
आयोजनाबाट वार्षिक २ अर्ब २८ करोड युनिट बिजुली उत्पादन हुनेछ। चालु वर्ष तीनवटा युनिटबाट २२८ मेगावाट र आगामी वर्ष थप तीन युनिटबाट २२८ गरि कुल ४५६ मेगावाट उत्पादन गर्ने लक्ष्य छ।
आयोजना पूर्णरुपमा संचालनमा आएपछि आयोजनाले विद्युत् विक्रीबाट वार्षिक करिब ९ अर्ब रुपैयाँ आम्दानी गर्नेछ ।
