काठमाडौं, ३१ असार । बजारमा तरकारीको भाउ अचाक्ली बढेको छ ।
पछिल्लो एक महिनाको मात्रै तुलना गर्दा हरियो तरकारीको भाउमा दोब्बर वृद्धि भएको कालीमाटी फलफूल तथा तरकारी बजार विकास समितिको तथ्यांकले देखाउँछ ।
विकास समितिको तथ्यांकलाई आधार मान्दा पछिल्लो एक महिनामा तरकारीको आयातमा भने कमी देखिएको छैन् ।
समितिको गत एक हप्ताको मात्रै तथ्यांक हेर्ने हो भनेपनि औषतमा दैनिक ६०० टन तरकारी कालीमाटी भित्रने गरेको छ । यो तथ्यांक अघिल्लो महिनाको तुलनामा कम भने होइन ।
दोब्बर बढ्यो मूल्य
गत असार २६ गते यस महिनाकै सबैभन्दा धेरै ७ सय ६१ टन तरकारी कालीमाटी तरकारी बजारमा भित्रिएको थियो । समितिको तथ्यांक मान्ने हो भने दैनिक ७ देखि साढे ७ सय टन तरकारी भित्रिए बजारमा तरकारीको अभाव हुँदैन् ।
समितिको विवरणअनुसार जेठमा औसत मूल्य प्रतिकिलो ५८.५० रुपैयाँ पर्ने मुला असारमा ९८.५२ रुपैयाँ पुगेको छ ।
त्यस्तै, जेठमा प्रतिकिलो २७ रुपैयाँ परेको बन्दा असारमा ५४.६६ रुपैयाँ पुगेको छ । स्थानीय काउली प्रतिकिलो ४२ रुपैयाँमा बिक्री भएकोमा अहिले ७०.६८ रुपैयाँ रहेको छ । जेठमा प्रतिकिलो बोडी ७४.४७ रुपैयाँ रहेकोमा असारमा ९६.३७ रुपैयाँ पुगेको छ ।
जेठमा प्रतिकिलो ७४.४७ मूल्य रहेको मकै बोडी असारमा ९६.३७ रुपैयाँ, प्रतिकिलो ५८.५० रहेको गाजर ९८.५२ रुपैयाँ, १ सय २१ रहेको मटरकोसा १ सय ४५ रुपैयाँ, प्रतिकिलो ४७ रहेर्को घिउसिमी ८६ रुपैयाँ परेको समितिको विवरण छ ।
प्रतिकिलो ३२ रहेको तिते करेला ५९ रुपैयाँ, ४१ रुपैयाँ रहेको लौका ५८ रुपैयाँ, ४२ रहेको घिरौंला ६१ रुपैयाँ, ५१ रहेको भेडे खुर्सानी १ सय ७ रुपैयाँ र ६९.५० रहेको हरियो धनियाँ १ सय ३२ रुपैयाँ पुगेको कालीमाटी तरकारी बजार विकास समितिको तथ्यांकले देखाउछ ।
यी सबै कालीमाटी तरकारी बजार भित्रको होलसेल मूल्य हो । तर, खुद्रामा आइपुग्दा मूल्य झन्डै दोब्बर नै पुग्छ ।
समिति भन्छ- ‘किसानले नै बढाए’
कालीमाटी फलफूल तथा तरकारी बजार विकास समितिका सूचना अधिकारी विनय श्रेष्ठ भने तरकारीको भाउ किसानबाट नै बढेर आएको बताउँछन् ।
‘तरकारीको मूल्य किसानबाट नै बढेर आएको छ,’ श्रेष्ठले क्लाउडपत्रिकासँग भने, ‘अघिल्लो वर्षहरुमा पनि यस्तै हुन्थ्यो, वर्षातको समयमा तरकारीको भाउ सामान्य अवस्थामा भन्दा बढ्ने गरेको छ ।’
यसको अलवा मौंसमी असर र उत्पादनमा कमी हुनुका साथै बाटोमा अवरोध हुने भएको कारण पनि मूल्य बढी भएको सूचना अधिकारी श्रेष्ठ बताउँछन् ।
श्रेष्ठले भने ‘यो मौसमी असर पनि हो, उत्पादन कम हुन्छ त्यसको अलवा तरकारी छिटो विग्रनुका साथै बाटोमा पनि विभिन्न प्रकारका अवरोधका कारण पनि तरकारीको भाऊ बढेको हो ।’
