काठमाडौं, १४ बैशाख । सरकारले नेपालमा रोजगारी गर्नेहरुका लागि दैनिक कार्यअवधि ८ घण्टा तोकेको छ । यो विश्वव्यापी मापदण्ड पनि हो । मजदुरका लागि ८ घण्टा काम, ८ घण्टा आराम र ८ घण्टा मनोरन्जनको दृष्टिकोणबाटै काममा लगाउने प्रचलन छ । त्यो समयभन्दा बढी काममा लगायो भने अतिरिक्त मूल्य तिर्नुपर्छ ।
नेपालमा रोजगारी गर्नेहरुले औसतमा दैनिक ६ घण्टा २९ मिनेट काम गर्ने सरकारी तथ्यांक सार्वजनिक भएको छ । अर्थातः नेपालीले सातामा औसतः ४४ घण्टा काम गर्छन् ।
राष्ट्रिय तथ्यांक विभागका अनुसार यातायात र भन्डारण क्षेत्रमा काम गर्ने मजदुरले भने सातामा ५५ घण्टा काम गर्छन् । उनीहरु दैनिक औसतः ८ घण्टा नै काममा घटिनु पर्छ ।
होटेल, रेष्टुरेन्ट, निर्माण जस्ता क्षेत्रमा काम गर्ने मजदुरले दैनिक ७ घण्टासम्म काममा खटिनुपर्ने तथ्यांक छ । नेपालमा पुरुषहरु दैनिक ७ घण्टा काममा खटिने गरेका छन् भने महिलाको औसतः काम गर्ने अवधि प्रतिदिन साढे ५ घण्टा देखिएको छ ।
नेपालमा माथिल्लो पदमा काम गर्ने महिला र पुरुषमध्ये महिला सबैभन्दा बढी समय काममा खटिने गरेको तथ्यांक छ । विभागका अनुसार पुरुष म्यानेजर औसतः सातामा ४८ घण्टा काममा लाग्ने गरेको पाइयो भने महिला म्यानेजर औसतः ४९ घण्टा काम गरेको विभागको तथ्यांक छ । नेपालमा कृषि क्षेत्रमा काम गर्ने मजदुर औसतः ४४ घण्टा प्रतिसाता मात्र काममा खटिन्छन् ।
कुन फिल्डका मानिस कति समय काम गर्छन ? (घण्टाप्रतिसाता)
कृषि, वन, मत्स्य पालन : ३६
खानी : ४५
उत्पादन : ४५
विद्युत, ग्याँस : ४९
पानी : ४६
निर्माण : ५०
होलसेल तथा खुद्रा व्यापार : ४६
यातयात र भण्डारण : ५५
होटेल, फूड सर्भिस : ५३
सूचना र प्रविधि : ४६
वित्त कम्पनी र बीमा : ४४
रियल इस्टेट : ४१
प्रोफेसनल, वैज्ञानिक तथा प्राविधिक : ४२
प्रशासन : ४५
सार्वजनिक प्रशासन, रक्षा, सुरक्षा : ४५
शिक्षा : ४०
स्वास्थ्य : ४६
कला, मनोरन्जन, सिर्जना : ४८
