काठमाडौं, १८ पुस । राजधानी वासीलाई मेलम्चीको पानी खुवाइने सपना देखाइएको २ दशक बिते पनि अझै पूरा हुन सकेको छैन ।
सरकार र राजनीतिक दलले काठमाडौंका बासिन्दालाई झुक्याउन प्रयोग हुँदै आएको मेलम्ची खानेपानी आउने मिति दर्जनौं पटक तोके पनि अहिलेसम्म पानी आउन सकेको छैन ।
मन्त्री फेरिए पिच्छै नयाँ भाका तोकिने गरे पनि मेलम्चीको पानी भने अझै ल्याउन सकिएको छैन । सेतो हात्ती बनाइएको आयोजना सरकारको चुनावी नारा मात्र हुनु, ठेकेदारको लापारबाही, कमिशनको खेल, कामदार अभाव, मुआब्जा विवाद, स्थानीयको विरोध लगायत कारणले निरन्तर काम हुन नसक्दा, २ दशक बित्दा पनि सम्पन्न हुन नसकेको हो ।
भाका तोक्ने तर, कहिल्यै पानी आउन नसकेको तीतो यर्थाथ बीच फेरि एक पटक चैतसम्म मेलम्चीको पानी ल्याइपुर्याइने भनेर नयाँ मिति तोकिएको छ ।
गत असारमा सुरुङमा समस्या देखिएपछि त्यसलाई सुधार गरी सुरुङको काम ९९ प्रतिशत सम्पन्न भए पनि विभिन्न चरणको प्राविधिक परीक्षण गर्न समय लाग्ने भएकोले आगामी चैत अन्तिमसम्म पानी राजधानी आउने मेलम्ची खानेपानी विकास समितिका सूचना अधिकारी सीडीइ राजेन्द्र पन्तले जानकारी दिए ।
जर्मनीबाट आएका चारजना प्राविधिकले आयोजनाको निरीक्षणका साथै डिजाइन तथा सम्पूर्ण रिपोर्टमा समेत अध्ययन गरी सकेको हुँदा अन्तिम प्रतिवेदन प्राप्त हुन बाँकी रहेको छ ।
प्राप्त प्रतिवेदनलाई नेपाली प्राविधिज्ञ र ठेकेदार कम्पनीबीच छलफलपछि मात्र सुरुङमा पानी राखिने कार्यक्रम रहेको छ । पानी राखेपछि पनि दुई महिनाको समय लाग्ने र सबै कुरामा सन्तोषजनक देखिएपछि मात्र राजधानी पठाइने हुँदा चैतसम्मको समय लाग्ने सूचना अधिकारी पन्तले बताए ।
गत असारमा फुटेका दुईवटा ढोकालाई भारतीय कम्पनीबाट जडान भइसकेको हुँदा सुरुङको ९९ प्रतिशत काम सम्पन्न भएको छ । हेलम्बुको अम्बाथानस्थित मुहानमा हेडबक्र्स (बाँध)को काम भने ९० प्रतिशत मात्र सम्पन्न भएको छ ।
बाँधको साथै पुलसमेत बनाउनुपर्ने भएकाले समय लाग्ने आयोजनाले जनाएको छ । एसियाली विकास बैंक एडीबीको ऋण सहयोगमा करिब ३३ अर्ब रुपैयाँ लाग्ने आयोजनाको जटिल मानिने २७ किलोमिटर सुरुङ तीन वर्षअघि सम्पन्न भइसकेको छ ।
दैनिक १७ करोड लिटर पानी राजधानी ल्याइने उक्त आयोजना पटकपटक पछि धकेलिँदै विभिन्न व्यवधान पार गरी अब भने सम्पन्नको अन्तिम चरणमा पुगेको छ । आयोजनाको दोस्रो चरणको दैनिक १७ करोड लिटरको लार्केको काम पनि अघि बढाइएको आयोजनाले जनाएको छ ।
दैनिक १७ करोड लिटरको तेस्रो चरणको माङ्ग्रीको काम सम्पन्न भएपछि राजधानीमा दैनिक ५४ करोड लिटर पानी ल्याइने लक्ष्य रहेको छ । रासस
